بعض النصائح للبنوتات

ازيكم يا احلى بنات في الدنيا
وفى بنات كتير لسه داخلين كليات و عايزين بقى يعرفوا ايه الجو والنظام و يعملوا ايه و كده عشان يعني جو الكلية بيكون منفتح كتييير عن جو ثانوي

واليك فتات بعض النصائح و الخبرات و المواقف اللي ممكن تقابلك
...
*مثلا في موقف مشهور أووي أول يوم بقى وانتي لسه راحة و غالبا ماتعرفيش حد و بتدوري على جدول المحاضرات و السكاشن و تلاقي واحد ناططلك يقولك "لوسمحتي معاكي قلم؟؟"..و اصلا جنبه يطلع ولا 20 واحد بينقلوا و معاهم مقالم و برايات كمان بس هي حبكت يعني..مااا علينا...تعملي ايه؟؟..اديله القلم لو معاكي واحد تاني..لو مش معاكي قوليله بكل بساطة معلش مش معايا واحد زيادة..و ده لأنه لو حس انك بتستزوقي معاه و بتديله قلمك هتلاقي كلام بيتفتح بقى و الموضوع هيقلب هزار و مجاملات و حاجات كتير مالهاش لازمة و لما تديله القلم لما يرجعهولك ((ده لو ماضربش عليه)) خديه وانتي ساكتة ولو حسيتي بقى انه هيتنح و يقف يرغي..سيبي المكان و اختفي من قدامه

*موقف تاني و هو بقى الاستعباط..يعني مثلا تكوني ماشية و حواليكي خلق الله كلهم.و سبحان الله يجي واحد يا عيني تايه يقولك "لو سمحت ماتعرفيش فين مبنى المدرجات؟؟" بمنتهى البساطة لو تعرفي المكان شاوريله عليه او حدديله الطريق..و بيني وانتي بتتكلمي انك بتشاوري و كده..عشان محدش يفتكر انك واقفة تتكلمي معاه..ولو ماتعرفيش قوليله معلش أنا مش عارفة..و سيبيه و امشي على طول..أما بقى لو صاحبنا استهبل بزيادة و قالك طب معلش مش عارف أفهم الطريق كده ممكن توصليني..قوليله معلش في واحدة مستنياني ضروري دلوقتي و كده ممكن أتأخر عليها..ممكن تسأل أي حد عن اذنك..و سيبيه و خدي طيارة و اخلعي

*نيجي بقى لموقف التعارف..يلاقي سياتك واقفة لواحدك ((و عشان كده بنبه عليكي أبوووس ايدك حاولي على قد ماتقدري ماتقفيش ولا تقعدي لوحدك..حتى لو هترخمي و تقعدي جنب بنات ماتعرفيهومش..عااادي..أنا كنت بعمل كده كتيييير))..يقوم يقرب بقى و الابتسامة من الودن للودن..و يقولك..انتي لسه جديدة؟؟..و تبقي بقى ((...........)) لو رديتي..بصيله كده باستغراب..و سيبي المكان وامشي..ولو فضل ماشي وراكي..ولاااا كأنه موجود أصلاااا..تخيليه واحد بيعاكس..أما بقى لو رديتي بأي حاجة حتى لو هزأتي أو جاوبتي على سؤاله..معلش ماتلوميش الا نفسك لأنك مش هاتعرفي تتخلصي منه تاني

*في بقى مواقف الجنتله..واحد مثلا يشيللك شنطة السفر بتاعتك..يناولك ازازة عالية عليكي في المعمل..معرفش يجيب قلمك اللي وقع..كل ده عاااادي..لا تكبري الموضوع ولا تقولي معجب بيا ولا بتشنجان..عااادي..قولي شكرا..و انتهى بس كده

*في أفندي بقى ده روميو..او موزع الابتسامات..تبقي قاعدة في المحاضرة وانتي في وااادي وهو في واادي و بينكو وااادي..و تلاقي راااس طالعة مشرئبة بصالك و مبتسمالك طوووول ال3 محاضرات
ده بقى مالوش غير حل واحد انك ماتبصيش في خلقته أصلااا..و تدعي ان الدكتور يقفشه و يهريه تهزئ

*سعات بقى بتبقي لسه متعرفة على شلة بنات جديدة و البنات دي ميكنش عندها مانع انهم يقعدو مع شباب عادي
نتخيل مثلا انك كنتي قاعدة معاهم و بعدين قام نزل بالبراشوط عليهم شابين ظراف كده و هاتك يا ضحك و هزار
تقومي انتي بمنتهى اللطف و الهدوء..تقولي معلش هاروح أشتري حاجة..أو أشوف حاجة..او أي عذر..و تقومي سايباهم و قايمة..و بينك و بين البنات دي بعدين عرفيهم بالراحة من غير أي تتش يحصل انك بس لما هيجي ولاد مش هاتعرفي تقعدي معاهم..بس يا ريت اوعي اوعي اوعي تحسسيهم من نبرة كلامك انك مثلا أحسن منهم أو انهم وحشين و دي على فكرة أحسن طريقة دعوة صامتة..و هتلاقيهم بعد كده بالتدريج بقو زيك..لما يلاقو الولاد اللي هم واقفين معاهم بيشكروا فيكي انتي و سيبك بقى من اللي تقولك انتي مكبراها و خنيق و متشددة و الكلام ده..سيبك منها و برضو اتعاملي معاها بالحسنى ^_^

دي يعني بعض المواقف اللي قلت انها ممكن تنفعك
و أخيرا بس احب أقولك كلمة حبيبتي حطيها حلقة في ودانك يا بت
اوعي ثم اوعي مهما كنتي كويسة واخلاقك عالية تبصي لواحدة بتعمل حاجة غلط انها أقل منك أو انك أحسن منها
لأ
محدش كبير على الغلط
ممكن ربنا في ثانية بسبب تفكيرك ده يعاقبك انك تقعي في نفس الغلطة من غييييير ماتحسي خاااالص
فاحمدي ربنا على طووول لأنه هو اللي صانك و حماكي من الغلط ده
و يجوز اللي قدامك دي تموت على طاعة و انتي على معصية..يبقى مين ساعتها احسن؟؟
و آخر نصيحة مني ليكي
عليكي بالصحبة الصالحة
عليكي بالصحبة الصالحة
عليكي بالصحبة الصالحة
دوري عليها وامسكي فيها باديكي و سنانك
هم دول اللي هيعينوكي ولو غلطي في يوم هيرجعوكي و هيحبوكي بجدددد
وانا مستعدة اكون اختك و صحبتك في الله ♥ ♥

ليه تفقد الامل؟
زى ما فى الوحش اكيد فى الكويس
بس الحكايه كلها التوعيه من الاهل
ودى اللى بقت قليل فى الزمن ده اوى
ان الاهل مش بيوعوا ابنائهم خصوصا البنات قبل دخولهم الجامعات
وبالذات دى مرحله مختلفه جدا عن كل المراحل


ويااااااااااريت البنات تفهم انها فى الاخر الولاد هما اللى بيضحكوا عليها
وبعدين بيعتبروها بلا قيمه
والمشكله ان البنت بتفتكر عكس كده تمامااااا


وياريت الشباب يتقوا ربنا فى اى حاجه بيعملها
عشان فى شويه شباب بيكونوا مصايب
دا انا قعدت سنه اهو فى المعهد
بس شوفت مصايب فيه



ربنا يهدى اشباب جميعاااااا

فعلا كتكوته
انتى تفكيرك كويس
وعايشه اخده بالك من الدنيا
فعلا المشكله الاساسيه فى الاهل
انتى لسه فى المعهد ولا ايه

المفروض اصلا البنت صحبتها اللانتيم هى مامتها

بدل ما تشوف من بره مين اللى ممكن تحكيله
وغالبا تصاحب شاب
عشان ملقتش النصيحه من الام ولا الاب ايه الصح وايه الغلط
وتقع فى مليوووون غلط

ربنا يهدى شباب وبنات المسلمين يارب


اه انا داخله تانيه ان شاء الله

ربنا يوفقك
وتجيبى ترتيب على الجمهوريه
انتى شعبه ايه

حلو قوي يا كتكوته الموضوع ده
بجد ربنا يحميكي يا رب
ويحفظك يا قمر
بس علي فكره يا كتكوته في الجامعه مفيش حاجه اسمها صاحبتك الانتيم لان اي بنت بتتعرف عليكي
في الجانعه بتبقي مصلحه مش اكتر
ولو بقي اتغاظت منك وانتي قايله ليها سر يبقي عليه العوض
عشان كده احسن حل خلي سرك لله يبقي هو كل حاجه في حياتك
وربنا يبارك فيكي يا رب وتنجحي كمان

اي

ربنا يخليكى يا حببتى على زوءك

بس مش كله كده
انا فى المعهد ليا اصحاب انتيم اوووى
وبحب احكيلهم اى حاجه
واصحاب بمعنى الكلمه
ربنا يخليهوملى
وفى بنات من النوع اللى حقود
وده قبلت منه برده

الموضوع شكله كويس
هقرأه بعدين وأقول رأيي