المعهد الفنى الصحىدخول

منتدى المعهد الفنى الصحى |اشعة|معمل تحاليل|احصاء|صيانة|اسعاف|

منتدى المعهد الفنى الصحى يرحب بجميع الأعضاء فى غرفة الدردشة

descriptionبدون ايقونةمقال عاجبنى

more_horiz
اسعاد يونس
يا ساتر على عادل إمام ومحمود عبدالعزيز وغادة عبدالرازق والناس دى.. مُصرّين يطلعوا يضايقونا ويقطعوا علينا متعة مشاهدتنا للإعلانات.. كل ساعة كده يخش واحد منهم يمثلنا بتاع دقيقتين تلاتة ويشتت تركيزنا مع زانوسى وقطونيل والواد اللى بياكل صاحبه وأبوه..

■ إشادة واجبة بالداعيين الإسلاميين الشابين معتز مسعود ومصطفى حسنى اللذين يظهران فى إعلان ترويجى لمركز البروفيسور مجدى يعقوب لأمراض القلب.. متحدثين عن إنجازات هذا المركز ودوره فى إنقاذ حياة أطفال مثل صُهيبة فاروق الجميلة.. أتعجب من هؤلاء الذين هاجموا المركز وأرادوا هدمه وتطفيش الراجل العالم الجليل اللى اتجنن فى نافوخه وقرر يترك التقدير العلمى والإنسانى والمجتمعى الذى يتمتع به فى بلاد الكفرة ويركن لقب السير على جنب وينزل كل كام يوم لحد أسوان يساعد بلده ويعالج أطفال هذا البلد ببلاش ومن جيبه الخاص ومساعدات أهل الخير.. ماعندهمش دم دول؟؟.. قلبهم مارفرفش لرؤية صهيبة وهى تقول «أنا نفسى أعيش»؟؟.. نفسها تعيش يا جبلات مش تموت على إيدين أمثالكو.. لأ والأكادة بيهاجموا الشابين النابهين المسلمين بحق عشان بيروجوا لطبيب قبطي!!!.. يا سآلة أهاليكو يا أخى.. يا ضحالة أفكاركو وقصر ديل معلوماتكو.. خنيقين بجد.

■ خبر نشرته جريدة «ديلى ميل» البريطانية عن أول قناة تليفزيونية للمنتقبات اسمها قناة ماريا.. وبتستعرض فكرة القناة وأهدافها وليه تليفزيون مش إذاعة وشوية كلام فى الموضوع مافرقش معايا بالمرة.. كل واحد حر يعمل اللى هو عايزُه مدام مابيرخمش على حد جنبه.. اللى بيفرق معايا دايما هو تعليقات القراء.. وفى هذه الحالة كانت التعليقات من القراء الأجانب حيث قرأت الموضوع من على موقع الجريدة باللغة الإنجليزية والتى يطالعها ثلاثة ملايين نسمة يوميا من جميع أنحاء العالم.. صعبانة عليهم ثورتنا قوى.. بينعوها كأنهم حضروا جنازتها وطالعين عليها زيارة لترب الغفير.. الدوام لله وحده..

■ يا جدعان احنا مفضوحين فى الخارج فضيحة ونيس ع الطريق الزراعى.. برضه فى صحيفة «تليجراف» خبر عن البعثة الرياضية المصرية التى تمثل مصر.. شاخدلى بالك.. يديكو طولة العمر مصر بتاعة زمان الحلوة الكبيرة دى.. البعثة مكونة من 117 لاعباً وتمثلنا فى أوليمبياد إنجلترا 2012.. المسؤولون الجهابذة فى مصر باعتين العيال بهدوم مضروبة.. عليها علامة نايك العالمية لكن مزيفة.. وبرضه ضاربين أديداس فى السكة.. مين فقس بقى؟؟.. شركة نايك العالمية.. تدور فى سلقط فى ملقط عن المسؤولين المصريين عشان تطالب بتحقيق فى الموضوع.. مفيش.. يمكن صايمين ف رمضان ومقيلين م الحر.. وطبعا نايك مقومة الدنيا وناوية على شر دفاعا عن حقوق ملكيتها الفكرية والعلامة المميزة اللى بتصرف عليها ملايير العملات الصعبة.. دى الصين ملكة ضرب الماركات فى العالم ما استجرتش تعملها.. ماله حلاوة بس مش فاهمة..

■ رحم الله اللواء عمر سليمان.. لقد انتقدت هذا الرجل بشدة فى حياته.. ووجهت إليه كلاما لاذعا سخيفا معبرة عن رأيى فى قراراته السياسية الأخيرة والتى كانت تمس الوطن.. لكننا فى بيوتنا التى تربينا بها تعلمنا أن المتوفى لا تجوز عليه إلا الرحمة وأن الألسنة تخرس ويموت الكلام مع موت الشخص.. لذلك توقفت كثيرا عند هوجة الشماتة فى موته وكم الألفاظ الوضيعة السوقية التى قيلت عنه وهو يرقد فى كفنه.. والتى خرجت فى شكل خطب وفتاوى وحنجورى م الغليظ قوى من السادة منافيخ الكلام اللى ربنا بلانا بيهم.. كأن الذين أطلقوها مااتربوش ف بيوت أصلا.. الراجل يعملكو إيه أكتر من كده؟؟.. مات.. يعمل إيه تانى؟؟.. إيه وجه الرجولة فى سب جثة؟؟.. عمرى ما شفت ناس متغاظين من واحد.. يقوم لما يموت يقفوا على جثته ويقولوله «أحسن»..

■ نوك نوك نوك.. ميييييييييييييييين.. إحم سيادتك ممكن أخُش؟؟.. إنت مييييييييييين؟؟.. أنا لا مؤاخذة بعيد عن سعادتك الشعب.. إممممممم.. ومالك مكسى أسمال بالية والقحط ناضح على سحنتك كده؟؟.. حانعمل إيه بقى سعادتك؟؟.. سنتين إلا ربع وأنا متلطم فى الشوارع.. لا عارفلى قعدة ولا عادلة.. بصرف من لحمى الحى والرزق قاطع والعيشة سواد.. مش فاهم حاجة خالص.. كل ما أصدق حد وابتدى ارتاح على جنب أصبح ألاقيه فشنك أو حد يكرهنى ف أمه.. مش عارف أروح فين ولا أكلم مين.. زى اللى كان مركون على حيطة بيت كبير وعارف إنه مستور بيه واتدور فجأة لقى قبض الريح.. أفففففففف.. لخّص.. أؤمر.. إشجينى.. إطربنى.. العفو يا بيه الأمر لله وحده لا قبله ولا بعده.. أنا مابأمرش وصوتى مبحوح مش قادر اشجى.. وبنشز جامد ف مش حايطلع منى طرب خالص.. أمال عايز إيه؟؟.. إنجز.. ما تخنقنيش.. لا ولا حاجة يا فندم.. أنا بس يعنى.. والله مكسوف أقول.. الواحد محرج ييجى بتاع طن إحراج كده.. لو فيها رزالة وتناحة وتباتة يعنى.. هو إيه النظام سعادتك؟؟.. آآآآآآآآآآه.. أنا غلطان اللى قلتلك تخُش.. نظام إيه ياخويا؟؟.. بقولك إيه.. عايز تتنيل تهتف وتحزق.. خد الباب ف إيدك وانزل تحت.. عندك التحرير.. لا لا التحرير حبايبنا وكفاءة.. روح المنصة.. إحزق هناك لحد ما ينفجرلك عرق وبلالين صدرك تطرقع..

■ أنا مش عايز أكتر من إجابة سعادتك.. إحنا معاكو ولاَّ مع نفسنا؟؟.. الكلام كتر قوى.. وبدل ما نسخن ع الفاضى.. جاوبونا.. إحنا لينا فى الليلة ولاَّ برطمان المربة اتلهط خلاص؟؟.. معزومين ع السُفرة دى ولاَّ نستنى الفتافيت برّه؟؟.. ما يجراش لما تجامل الحبايب والقرايب والجيران.. بس لما تجامل جامل من جيبك مش من جيبى.. واللى عايزه البيت يحرم ع الجامع.. والرملة من أرضى تسوى رقاب.. أنا خارج.. بس أمانة عليك يا شيخ.. إوعى تستوطى حيطى.. وتطمن إنك موكلنى المهلبية.. أنا اللى اتقال فيا.. قتلة الظلمة وهادمو الأمم.. ما أتى عليهم قادم بشرّ إلا أكلوه كما تأكل النار أجف الحطب.. اتق غضبهم ولا تشعل نارا لا يطفئها إلا خالقهم وانتصر بهم فهم خير أجناد الأرض.. سلامو عليكو..

نقلاً عن المصري اليوم


مقال عاجبنى Alfaris_net_1298848768

descriptionبدون ايقونةرد: مقال عاجبنى

more_horiz
وعجبنى انا كمان

بيروجوا لطبيب قبطي!!!.. ههههههههههههههههههه

والله انا اول مرة اعرف انه قبطى

وبعدين كلمه قبطى كانت تقال لكل ما هو مصرى

وحتى لو هو نصرانى ايه المشكله هو مصرى فى الاول والاخر

وبعدين لو جينا ندور على الحق النصارى او المسيحيين والمسلمين

لا ينفع دول يعيشو من غير دول ولا دول من غير دول

يعنى بمعنى اصح كلنا بنكمل بعض

ولو جينا ندور حوالينا هنلاقى ان مفيش حد مش ليه اصحاب من الطرف التانى

انا عن نفسى فى جميع مراحل دراستى كان ليا اصحاب وزمايل نصارى وكنت متداخله معاهم جدا

وكنا سعات بنتناقش فى امور دينيه كتير رغم ان سننا كان لا يسمح او ان معلوماتنا وحججنا كانت ضعيفه

بس الموضوع ابسط من كده بكتير وحاليا ليا صديق هو كاتب الموضوع

وانا بسمى الناس اللى بتعمل فرق بس كلمه مسلم ومسيحى ( بالمعقد نفسيا)

وبقولهم طالما انت عندك التفريق ده خليك فى حالك وتتكلمش فى الفاضى

اما بالنسبه لمعتز ومصطفى مع حفظ الالقاب

انا واحده من الناس مش بسمعهم

اما قناة المنتقبات والله هى فكرة حلوة بس انا مش حباها ماشى حضراتكم منتقبات وداعيين الى الله ماشى

ممكن فى المساجد او الدروس المعروفه للبنات والسيدات اما قناه ............. الموضوع كبيير ويمكن معلوماتى

غير كافيه ................ بس ربنا يقدم اللى فيه الخير

وتسلم ايدك ميلاد على الموضوع الحلو ده

وبعتذر على الاطاله

descriptionبدون ايقونةرد: مقال عاجبنى

more_horiz
شكرا للمرور والتعليق باجمل الكلام

بس فى نقطة احنا كمسيحين نفصل كلمة مسيحى بدلا عن ناصرنى

لان يشتق اسم ديتنا من المسيح بشخصه مش مكان اقامته اللى هى الناصرة وهى المسيحية


وعلى فكرة المقال كمضمون بيتكلم عن الاحداث الجارية الان


وهو منقول عن جريدة المصرى اليوم بقلم اسعاد يونس


مقال عاجبنى Alfaris_net_1298848768

descriptionبدون ايقونةرد: مقال عاجبنى

more_horiz
لا شكر على واجب موضوعتنا هى مصدر تواصلنا مع بعض

وبعتذر على كلمه نصرانى وببدلها بمسيحى

اه م انا عارفه انه عن الاحداث الجاريه

بس بردو تسلم ايدك ومجهودك

ودائما فى تألق

descriptionبدون ايقونةرد: مقال عاجبنى

more_horiz
المقال جميل جدا


[مقال عاجبنى Ebq
صلاحيات هذا المنتدى:
لاتستطيع الرد على المواضيع في هذا المنتدى